_ بعد رجوعي عالبلد بلهفة

_ التقيت بالجارة الصغيرة صدفة

_ كانت واقفة عالشرفة


_ عم تمسح بللور الدرفة

_ قلت بسلم و بسألها بكرا العيد أو الوقفة ؟
...
_ زتت بخاخ القزاز و الجريدة و الشقفة

_ قالتلي بتعرفني ؟ و قربت عالشارع نتفة

_ قالتلي شكلك غريب أو من البلد بس بتحب النهفة

_ رح خبرك و بعدها روح تآآوى بشي غرفة

_ قبل ما يبدا الفيلم و تشرب من الخوف رشفة

_ دمدمت و قلت شكلها هالحلوة مخرفة

_ سمعتني قالتلي شوي و بتعرف الوضع حق المعرفة

_ و إلا ما تحضر بعد شوي عنا شي زفة

_ و مابظن في عيد لأن في أزمة و خفت كتير الألفة

_ تركتها و مشيت و قلت أحسن شي التبعيد

_ و اذ صوت رصاص و مدفع من بعيد

_ رجعتلها . . . قلتلها . . . أكيد بكرا العيد

_ عينها دمعت و قالت بكرا منعرف اسم الشهيد

_ تذكرت أخبار الدنيا " الجزيرة " الجديد "

_ سكتت و طريقي كملت و قلت يا رب يا مجيد

_ فتت عالحارة و التقيت بجارنا الكبير أبو فريد

_ السلام عليكم - - كيفك عمي كيف صحتك يا عقيد

_ شو أخبار الحارة ؟ و شو في جديد ؟

_ سكت و قال بصوت خافت مع التنهيد :

_ يا ابني حياتنا صارت : بدون تمهيد ~ ~

" خوف " ملل " معاناة " و كتر التشريد "

" خرف " علل " مأساة " و زاد التهديد "

> > للأسف ~ ~

_ صار في بلدنا تمن الروح زهيد

_ صار عادي تشوف دبح من الوريد

_ صار الأخ يكره أخوه لأنو برأيه متمسك و عنيد

_ صار التفاهم عنا بلغة النار و الحديد

_ و يلي عم يزيدنا أسى و تنكيد

_ نقاشات عقيمة بين ابن و أبوه و حتى الحفيد

_ تركني و راح . . قلتله : طيب و العيد ؟ ؟

_ جاوبني بحرقة قلب من ورا باب الحديد

_ ابني روح عالبيت و جهز أغراض العيد

_ يمكن تفرج بهالليلة و يكون عيد سعيد

_ بس . . لو بدها تمطر كان شفنا غيوم من بعيد

_ ما النا غير الدعاء و الله يفرجها عالعبيد

_ و يتقبل كل واحد مات فدا الوطن شهيد

_ و ترجع المحبة بين الناس من أول و جديد

_ قلت آمين آمين يا رب أنت القادر الوحيد

_ قعدت و قلت هاد هو بيت القصيد

_ لا في عيد و لا طقم جديد

_ في حزن و ألم كل يوم عم يزيد

_ و شيخ كبير بيدعي و أم خايفة ع طفلها الوليد