أجاوب أنا بقى السؤال

نعمة القرآن

أيوه والله ، تشمل كل هذه النعم وزيادة كمان.
نعمة عظيمة جدا
بيها تنال رضا الله
وتجلب الرزق
وتعينك على الطاعات
وتريح القلب وإذا ارتاح القلب شفي الجسد
و..و..و..و.........

هو فيه أعظم من كده
يكفينا شرف وفخر إنه كلام رب العالمين الذي نزله على قلب سيد المرسلين

"الرَّحْمَنُ * عَلَّمَ الْقُرْآنَ"

"وَإنَّكَ لَتُلَقَّى القُرآنَ مِن لَّدُنْ حَكِيمٍ عًلِيمٍ"

بس للأسف مش عارفين نستمتع بيها

تلاقي مسلم عنده سبعين سنة -ما شاء الله لا قوة إلا بالله- واقف يصلي بالساعات

وهو في منتهى الاستمتاع بكلام الله
في حين إن الواحد منا وكتيرغيرنا في سن الشباب والله ما بيكمل حتى ربع ساعة في صلاة


وإلا بقى لو كان مأموم والإمام طول حبتين ،
يبقى في منتهى الغضب وطول صلاته يفكر ياترى امتى الإمام هيركع هيسجد هيسلم
لا فاهم ولا دريان بأي حاجة غير امتى هيخلص
ما هو لو كان فاهم هو بيقول إيه ولا حتى عارف مدى عظمة القرآن مكنش ده بقى حاله
وكان تمنى يفضل عمره كله في صلاة بين يدي الله ، ولسانه لا يخرج إلا القرآن
"ق وَالْقُرْآنِ الْمَجِيدْ"

"وَإنَّهُ فِي أُمِّ الْكِتَابِ لَدَيْنَا لَعَلِيٌّ حَكِيمٌ"

أم الكتاب هو اللوح المحفوظ

"وَلَوْ أَنَّ قُرْآناً سُيِّرَتْ بِهِ الْجِبَالُ أوْ قُطِّعَتْ بِهِ الأرْضُ أوْ كُلِّمَ بِهِ المَوْتَى .."

جواب الشرط محذوف وتقديره -لكان هذا القرآن-

نكمل كلامنا

طب ليه الواحد مش عارف يستمتع بالقرآن؟؟
علشان المنسوب الإيماني في القلب انخفض جدا يكاد يكون انعدم
بقينا بنأدي عبادتنا تأدية واجب مش أكتر

بتصلي ليه؟
مممم ، عشان المفروض أصلي !!!!

بتتحجبي ليه؟
عشان المفروض أتحجب !!!!

بتقرأ القرآن ليه؟
ولا عارف إجابة أساسا
ولا حول ولا قوة إلا بالله

الرؤية مابقتش واضحة كفاية عشان نميز الهدف من الوسيلة
بإذن الله هبقى أتكلم في النقطة دي بعدين ، ونرجع للقرآن دلوقتي

نيجي نقول طب ليه القرآن نزل ، طبعا : "لا يُسْئَلُ عَمَّا يَفْعَلُ وَ هُمْ يُسْئَلـُونَ"


ولكن نقصد الفائدة التي أراد الله أن يلقيها علينا بالقرآن

" ألر كِتَابٌ أنزَلْنَاهُ إليكَ لِتُخْرِجَ النَّاسِ مِنَ الظُلُمَاتِ إلَى النُّورِ بِإذْنِ رَبِّهِمْ إلَى صِرَاطِ الْعَزِيزِ الْحَمِيدِ"

" إنَّ هَذَا القُرآنَ يَهْدِي لِلَّتِي هِيَ أَقْوَمُ وَيُبَشِّرَ الْمُؤْمِنِينَ الَّذِينَ يَعْمَلُونَ الصَّالِحَاتِ أنَّ لَهُمْ أَجْراً كَبِيراَ"

"قُلْ أُوحِيَ إلَيَّ أنَّهُ اسْتَمَعَ نَفَرٌ مِنَ الْجِنِّ فَقَالُوا إنَّا سَمِعْنَا قُرْآناً عَجَباً * يَهْدِي إلَى الرُّشْدِ فَآمَنَّا بِهِ وَلَن نُّشْرِكَ بِرَبِّنَا أحَداً"


القرآن ما أُنزل إلا ليُتَّبَع
القرآن كله من أوله لآخره عبارة عن افعل ولا تفعل
أوامر ونواهي
والأمر لا يكون له إلا التنفيذ والنهي لا يكون له إلا الانتهاء
تتاخد على بعضيها مش اللي عاجبنا نعمله واللي مش عاجبنا نسيبه
بيكون الأمر صريح ولا جدل فيه
وتلاقي فلان يمر على الأمر ده ولا يمثل له أي شئ
كأنه مش موجه ليه أساسا
لأ وإيه ، يقولك يااااه ده انا بحب ربنا حب

"وَهَذَا كِتَابٌ أَنزَلْنَ ناهُ مُبَارَكٌ فَاتَّبِعُوهُ وَاتَّقُوا لَعَلَّكُمْ تُرْحَمُونَ
"الَّذِينَ يَسْتَمِعُونَ الْقَوْلَ فَيَتَّبِعُونَ أحْسَنَهُ أولَئكَ الَّذِين هدَاهُمْ اللهُ وَأولَئكَ هُمْ أُولُوا الأَلْبَابِ"
لو كان حبك صادقا لأطعته ... إن المحب لمن يحب مطيعُ

ــــــــــــــــــــــــ

نيجي للسؤال

هي إيه اللي ماتعديهاش
ده هتعرفوه المره الجايه

ملحوظة:

المرة الجاية كل واحد يكون محضر معاه ورقة وقلم قبل ما يدخل المنتدي
بتكلم بجد مش هزار
سامعين؟
إوعوا حد ينسى

السلام عليكم ورحمة الله
ازيكم عاملين إيه؟
ها ؟ جبتوا الورقة والقلم اللي قلت عليهم؟
ايه ده؟ ده في ناس لسه.
طب اللي مجابهمش يقوم يجيبهم وأنا هستنى.

خلاص جبتوا؟

تمام

يلا السؤال الأول: إجباري: (يعني لازم تلاقي إجابة)
أكتب نبذة مختصرة عن: أكثر ذنب أذنبته يؤرقك و يعذبك. (بكل صراحة ، ربنا شايفك)


(الإجابة في الورقة طبعا ،
يسمح بأكثر من إجابة
ولو ملقتش إجابة خالص يبقى دخلت في سكة غلط
آفة الإنسان: رضاه عن نفسه)
خلي بقى الورقة والقلم على جنب ، هنكتب كمان شوية (ماتخافوش هتكتبوا حاجات كتير تانى

---

---

وزي ما كل حاجة ليها أصول ،

أولاً: خلي الوِرد القرآني بتاعك زمني مش كمي.
؟؟
يعني النهاردة مثلاً بدل ما أقرأ جزء ، أقرأ لمدة نصف ساعة

(و زي ما تيجي بقى ، جزء أو سورة أو صفحة
أو حتى آيـــــة واحــدة)
الهدف هنا الاستمتاع مش كسب سباق

ثانياً: استعداد ذهني.
يعني تكون اكل كويس ، مصحصح وفايق ، قافل الموبايل ، مش عندك معاد
قاعد في أوضة هادية.
بلاش النشاط المفاجئ اللي بيحل على الواحد ، يبقى مرووش ، يبص يمين وشمال
وشوية يلعب في الموبايل وشوية يلف في البيت وشوية يقف في الشباك ...
والكلام ده ؛ ياريت نهدا عشان نركز.

ثالثاً: استعداد قلبي.

﴿ إِنَّ فِي ذَلِكَ لَذِكْرَى لِمَن كَانَ لَهُ قَلْبٌ أَوْ أَلْقَى السَّمْعَ وَهُوَ شَهِيدٌ ﴾

خلي قلبك حاضر معاك قبل ما تقرأ ، استحضر عظمة القائل ،
راجع الموقف في دماغك (أنا جي أقرأ القرآن لله وحده وهو شاهد عليَّ ويسمع قراءتي ....)
لو لسه مش حاسس بفرق ، عليك بالإنعاش الصناعي ؛
تذكر الموت ، شوف كام حد من زمايلنا توفَوا السنادي ولا اللي قبلها ،
تخيل
لو كنت مكان حد فيهم ، تخيل مشهد الاحتضار ، تخيل نزولك القبر وحدك
ومحاسبتك فيه.
قال الله جل وعلا:
﴿
قُُلْ ءَامِنُوا بِهِ أَوْ لا تُؤمِنُوا إِنَّ الَّذِينَ أُوتُوا
الْعِلْمَ مِن قَبْلِهِ إِذَا يُتْلَى عَلَيْهِمْ يَخِرُّونَ لِلأَذْقَانِ
سُجَّدًا *
وَيَقُولُونَ سُبْحَانَ رَبِّنَا إِن كَانَ وَعْدُ رَبِّنَا
لَمَفْعُولاً * وَيَخِرُّونَ لِلأذْقَانِ يَبْكُونَ وَيَزِيدُهُمْ
خُشُوعًا ﴾

وقال:
﴿
اللهُ نَزَّلَ أَحْسَنَ الْحَدِيثِ كِتَاباً مُتَشَابِهاً مَثَانِيَ
تَقْشَعِرُّ مِنْهُ جُلُودُ الَّذينَ يَخْشَوْنَ رَبَّهُمْ
ثُمَّ تَلِينُ
جُلُودُهُمْ وَقُلُوبُهُمْ إلَى ذِكْرِ اللهِ ذَلِكَ هُدَى اللهِ
يَهْدِي بِهِ مَن يَشاءُ وَمَن يُضْلِلِ اللهُ فَمَا لَهُ مِنْ هَادٍ ﴾


رابعا: زينوا القرآن بأصواتكم.

اتل القرآن تلاوة وليس سرد ﴿ وَرَتِّلِ الْقُرْآنَ تَرْتِيلاً ﴾
على مهلك خالص ومتستعجلش مفيش حد بيجري وراك
إدي كل حرف حقه وانطقه صح
لو مش عارف إسأل
لو ملقتش حد تسأله اسمع الآيات اللي هتقرأها لأحد المقرئين اللي تقدر تتبين نطقهم
اقرأ بخشوع وتأثر
وافتكر إنك بتقرأ قرآن مش جرنال
ذُكِر أنَّ عمر بن الخطاب خرج يعس ليلة من الليالي

فمر بدار رجل من الأنصار، فوافقه قائمًا يصلي ،
وقف يستمع لقراءته فقرأ: وَالطُّورِ * وَكِتَابٍ مَسْطُورٍ [الطور:1-2]
حتى بلغ: إِنَّ عَذَابَ رَبِّكَ لَوَاقِعٌ * مَا لَهُ مِنْ دَافِعٍ [الطور:7-8]
فقال عمر : قسم حق ورب الكعبة،
ثم نزل عن حماره، واستند إلى حائط فمكث مليًا ،
وبه ما به، ثم رجع إلى منزله فعاده الناس، لا يدرون ما مرضه.
هذا حاله مع آية من آيات القرآن. فما حالنا مع كتاب الله؟
عُمْيٌ عن الذِّكْرُ والآيات تَنْدُبُنَا ..... لو كلَّم الذِّكْرُ جُلْمُودًا لأبكاهُ


خامسا: افهم ما تقرأه.

مش لازم تكون حافظ كتب ومجلدات التفاسير علشان تفهم

متستصعبش العملية الموضوع سهل جدا
لغتك هي لغة القرآن والقرآن واضح يبقى إيه المشكلة؟

لو لقيت كلمة مش عارفها دور عليها في كتاب أو في موقع موثوق فيه
لو مكسل تدور اسأل حد من صحابك ممكن يكون عارف ولو مش عارف هيسأل ويقولك
على فكرة مش هتكون فاهم القرآن كله كده بين يوم وليلة
خدها واحدة واحدة ، خد من التل يختل

وخلي عندك النية بتعلم كل القرآن يعني ناوي وفي نفس الوقت بتتعلمه
حتى لو
ببطئ ولو مش لحقت لآخر عمرك هتكون أخدت خلاص الجزاء كاملا بشرط صدق
النية
واعلم أن القرآن لن يعطيك بعضه حتى تعطيه كلك

تحفة

موضوع اقل ما يقال فية انة

تحفة

جزاكِ ربى الفردوس الاعلى على مجهودك ومشاركاتك القيمة

منتهى التقدير واحترام بلا نهاية

وعليكم السلام ورحمة الله وبركاته
الرائعه حنين الروح
موضوع رائع جدا
والسؤال في البداية والاجابة عليه وبعدها تجميعك للنعم في نعمة القرآن
وطريقة احضار الورقة والقلم وكتابة ذنوبنا وتحضير انفسنا لقراءة
اكثر آيات تؤثر في قلوبنا
والتوقف عند الاية التي فيها خشوعا اكثر
كل هذا كان ممتعا ورائعا
أسأل الله لكِ الجنة على هذا الموضوع الرائع المبارك
وأن يوفقنا لفعل مافيه من خير
وفقك الباري

اخى الفاضل الذهب العتيق
وأختى الغاليه نقاءالروح
جزاكم الله خيرا
وبارك الله لكم وفيكم
شكرا جدا على المتابعه ومروركم الطيب